Android 死忠 不換iPhone的N個理由

身為Android粉絲，又來到一年一度最無癮的日子。無他，由今日開始，會有連續幾星期，全世界的手機廠商都消失晒，根本選擇不多，每日都只有蘋果！但我想講，因為幾個理由，我決定繼續做Android死忠！

1. 我嫌貴

iPhone 7最平5,588港元起，最貴的7 Plus 128GB盛惠7,388港元？！唔好去搶？余家貧，香港百物騰貴，買嘢應該要諗過度過。如果我要買智能手機，有平價內地品牌，中價機更加有各大廠牌任揀，以性價比計，iPhone 7真係輸十條街！

【延伸閱讀】一幅圖睇晒中、港、台、日iPhone 7 官網售價

2. 我討厭無得揀

退一萬步說，我願意用5千元以上買手機，點解得一千零一個選擇？想功能多有三星，怕「爆炸」我可以買LG，要外型Sony根本冇得輸。蘋果，就只有一款iPhone！香港人最緊要有得揀！

3. 我討厭饑餓營銷

想要買部新iPhone，要校好鬧鐘去用按F5爭，仲要同一大班「超科技」鬥過，iReserve不用一分鐘就爆滿，慘過輪米。買部電話啫，點解要淪落到咁？

【延伸閱讀】iPhone 7 AOS 訂購攻略  準備狂F5

4. 我討厭跟風

想當年iPhone是個潮物，曾經用過iPhone的我，覺得自己走在時代尖「啄」，今日呢？前後左右，大叔阿嬸，中國大媽，全部都人手一機，你仲要繼續出埋啲「娘」到爆金色，OMG！

5. iOS無自由

最後喇！iOS裝Apps、平台唔夠自由出晒名！遠的不說，大家唔會忘記Pokémon GO，Android玩家有機會「用自己方法」輕鬆安裝遊戲偷步玩一排，iOS首先要轉store麻煩幾倍！

【延伸閱讀】教你用Apple Watch 玩 Pokémon GO